Fundargerð félagsfundar í Blindrafélaginu haldinn í samkomusalnum Hamrahlíð 17, 12. nóvember 2009.

Félagsfundur í Blindrafélaginu haldinn í samkomusalnum Hamrahlíð 17, 12. nóvember 2009.

Fundarefni:  Stefnumótun stjórnar Blindrafélagsins

Dagsskrá.  

1. Fundarsetning, kosning fundarstjóra og fundarritara.
2. Kynning viðstaddra.
3. Fundargerð síðasta félagsfundar borin upp til samþykktar.
4. Stefnumótunarskýrsla stjórnar félagsins kynnt og leitað eftir umræðum og viðbrögðum við þeim áherslum sem fram koma.

Kristinn Halldór Einarsson, formaður félagsins flytur framsögu

5. Umræður og fyrirspurnir.
6. Önnur mál.
7. Fundarslit

1.  Fundarsetning, kosning fundarstjóra og fundarritara.

Kristinn Halldór H. Einarsson formaður Blindrafélagsins setti fundinn kl. 17:00 og bauð fundarmenn velkomna.  Hann stakk upp á að Sigþór U Hallfreðsson verði kosinn fundarstjóri sem var samþykkt. Tók hann síðan við stjórn fundarins.  Eftir nokkrar umræður um fundarsköp var Ólafur Haraldsson kjörinn fundarritari.

2. Kynning viðstaddra

Fundarmenn kynntu sig eins og venja er á fundum Blindrafélagsins. Fundinn sóttu um 20 félagsmenn.

3. Fundargerð síðasta félagsfundar borin upp til samþykktar.

Fundarstjóri bar næst upp fundargerðir tveggja síðustu félagsfunda sem voru samþykktar án athugasemda.

4.  Stefnumótunarskýrsla stjórnar félagsins kynnt og leitað eftir umræðum og viðbrögðum við þeim áherslum sem fram koma.

Kristinn Halldór Einarsson, formaður félagsins flutti framsögu um stefnumótunarvinnu Blindrafélagsins sem hefur verið unnið að frá því í janúar 2009 fram til október s.l. Síðan hefur skýrslan verið kynnt á fundum með nokkrum hópum félagsmanna. Skýrslan á að marka sýn stjórnarinnar til næstu framtíðar og helstu atriði sem stjórnin vill leggja áherslu á næstu misserin.

Horsteinninn í stefnumótuninni er að skilgreina félagið sem mannréttindasamtök. Þar segir:

„Blindrafélagið, samtök blindra og sjónskertra á Íslandi, stofnað 1939, er samfélagslegt afl  – mannréttindasamtök -  sem berst fyrir að blindir og sjónskertir einstaklingar geti lifað sjálfstæðu, innihaldsríku og ábyrgu lífi, og að þeim sé tryggður jafn réttur og jöfn tækifæri til ábyrgrar, virkrar og viðurkenndrar þátttöku í öllum þáttum samfélagsins. Ekkert um okkur án okkar -  er sameiginlegt kjörorð sem Blindrafélagið á með öðrum samtökum fatlaðra.“

Gildi Blindrafélagsins eru sótt í meginreglur Sáttmála Sameinuðu þjóðanna um réttindi fatlaðs fólks. Meðal mikilvægustu gildanna í sáttmálanum eru: Jafnrétti, sjálfstæði, réttsýni og umburðarlindi.

Í skýrslunni segir að hlutverk Blindrafélagsins sé að stuðla að því að blindir og sjónskertir einstaklingar geti lifað sjálfstæðu og innihaldsríku lífi og séu ábyrgir og virkir samfélagsþegnar. Þar er lagt til að slagorð Blindrafélagsins verði: “Stuðningur til sjálfstæðis”.

Síðan er mat á stöðu Blindrafélagsins í samfélaginu og niðurstaðan er að staða félagsins sé í öllum aðalatriðum góð. Orðspor félagsins sé gott og almenningur sýni jákvæðan vilja til að styðja við félagið fjárhagslega. Álit félagsins sé einnig gott þegar kemur að opinberum aðilum og afstaða þess til málefna félagsmanna skipti máli. Félagið vilji koma fram sem öflugur málsvari félagsmanna og gæta hagsmuna þeirra í hvívetna.

Skýrslunni fylgir ítarleg verkefnaáætlun þar sem áherslur stjórnarinnar koma glöggt fram.

Að lokum segir í skýrslunni: “Mikilvægt er að hafa í huga að skýrsla eins og þessi kemur að mestu gagni ef hún fær að vera lifandi stjórnunar verkfæri sem er til stöðugrar skoðunar og endurskoðunar. Reglulega þarf að leggja á það mat hvort aðgerðaráætlunin er að skila félaginu nær skilgreindri framtíðarsýn og bregðast við með viðeigandi hætt ef svo er ekki.

Stefnumótun eins og þessi er aldrei endanleg, heldur mikið fremur síbreytileg.”

5. Umræður og fyrirspurnir.

Jolee M Crane tók til máls og kvartaði yfir því að skýrslan væri ekki nógu vel prentuð á blindraletri.  Gísli Helgason þakkaði fyrir góða og ítarlega skýrslu og benti sérstaklega á að aðgengismál þyrfti að lagfæra og vildi sjá meira um þann málaflokk í stefnumótun félagsins.

Kristinn svaraði og tók undir með fyrirspyrjendum hvað varðar punktaletur og aðgengismál. Hann taldi að félagið ætti að vera í fararbroddi á þessum sviðum. Minnti hann á að félagið hefði ráðið aðgengisfulltrúa til að sinna þessum málum.

Einnig tók Ásrún Hauksdóttir til máls og lagði áherslu á kynningarmál og mikilvægi Blindrabókasafnsins.

6.  Önnur mál

Jolee M Crane tók til máls og ræddi um aðstæður þeirra sem væru að missa sjón og spurði hvort létta ætti skilyrði til inngöngu í félagið.

Gísli Helgason spurði hver stefna félagsins væri varðandi ráðningar félagsmanna í störf hjá félaginu. Einnig ræddi hann um styrk félagsins til líknarfélagsins Bergmáls. Taldi hann viðhorf félagsmanna Bergmáls til blindra og sjónskertra vera gamaldags. Gagnrýndi hann styrkveitinguna.

Formaður sagði ekki standa til að breyta skilyrðum til inngöngu í félagið.

Hvað varðar störf hjá félaginu sagði hann aðalatriðið að ráða hæft fólk til starfa en störf skyldu þannig samsett að sem flestir gætu sinnt þeim.

Styrkurinn til Bergmáls væri veittur til húsbyggingar þeirra að Sólheimum enda hefði Blindrafélagið góðan aðgang að húsinu.

Einnig tóku Ólafur Þór Jónsson, Friðgeir Jóhannesson og Jóna Gísladóttir til máls um styrkveitinguna og varð um hana nokkurt orðaskak og þurfti fundarstjóri að lokum að áminna máltakendur og bað þá um að sýna kurteisi í tali.

Að því loknu þakkaði fundarstóri fyrir fundinn og gaf formanni orðið.

Formaður þakkaði fundarmönnum fyrir góðan en fámennan fund og sleit síðan fundi um klukkan 19:00.

Fundarritari:

Ólafur Haraldsson

l