5. stjórnarfundur Blindrafélagsins 2009 - 2010, haldinn 22. september 2009
- stjórnarfundur Blindrafélagsins starfsárið 2009 - 2010, haldinn þriðjudaginn 22. september 2009, kl. 09:15, í samkomusal félagsins að Hamrahlíð 17.
Mættir: Kristinn Halldór Einarsson (KHE) formaður, Ágústa Eir Gunnarsdóttir (AEG) varaformaður, Halldór Sævar Guðbergsson (HSG) gjaldkeri, Sigþór U Hallfreðsson (SUH) ritari, Arnheiður Björnsdóttir (AB) meðstjórnandi, Kolbrún Sigurjónsdóttir (KS) varamaður, Lilja Sveinsdóttir (LS) varamaður, Ólafur Þór Jónsson (ÓÞJ) varamaður, Haukur Sigtryggsson (HS) varamaður og Ólafur Haraldsson (ÓH) framkvæmdastjóri.
- Fundarsetning
Formaður setti fundinn kl. 09:15 og bauð stjórnarmenn velkomna til fundarins.
- Dagskrá
Fyrirliggjandi dagskrá fundarins samþykkt.
3. Fundargerð 4. stjórnarfundar
Samþykkt án athugasemda.
4. Bréf
Tölvubréf frá forstjóra ÞÞM dags. 04.09.2009 þar sem óskað er eftir því að Blindrafélagið tilnefni fulltrúa í punktaletursnefnd, en nefndinni er ætlað að ljúka gerð punktaletursstaðals fyrir Ísland. Samþykkt samhljóða að tilnefna Ágústu Eir Gunnarsdóttur fulltrúa félagsins í nefndina.
5. Skýrslur
a) Skrifleg skýrsla formanns var send stjórnarmönnum fyrir fundinn.
b) Skrifleg skýrsla framkvæmdastjóra var send stjórnarmönnum fyrir fundinn. Farið var yfir einstaka liði og þeir skýrðir nánar eftir atvikum. Athugasemd kom fram um að fyrirtækjasöfnun mætti vera fyrr á ferðinni en nú er.
6. Málefni Blindravinnustofunnar
Formaður hóf umræðuna og tilkynnti að tveir stjórnarmenn í Blindravinnustofunni ehf. hefðu sagt af sér og aðrir tveir hefðu beðið um að vera leystir undan störfum. Formaður lýsti því andrúmslofti sem undanfarið hefur verið í stjórn Blindravinnustofunnar sem leitt hafi til þeirrar stöðu sem nú er uppi. Hann telur að 3 kostir séu í stöðunni:
a) Kjósa nýja 5 manna stjórn.
b) Kjósa 3 manna bráðabirgðastjórn.
c) Stjórn Blindrafélagsins taki að sér stjórn Blindravinnustofunnar fram að næsta aðalfundi.
KS tók næst til máls og spurði hvort Margréti Gunnarsdóttur framkvæmdastjóri hefði verið sagt upp. Því var svarað neitandi. MG sagði sjálf upp.
HS spurði hvort fullreynt hafi verið að ná sættum innan núverandi stjórnar BVS. Formaður svarar að það hafi verið fullreynt.
HSG tók næstur til máls að sagði það sína skoðun að miðað við þá stöðu sem nú væri uppi, teldi hann heppilegast að stjórn Blindrafélagsins muni sjálf taka að sér stjórn Blindravinnustofunnar. ÓÞJ og HS tóku undir þessa skoðun.
ÓH tók næstur til máls og benti á að stjórnarmenn í Blindrafélaginu myndu þá taka persónulega að sér að skipa næstu stjórn Blindravinnustofunnar, þ.e. að 5 aðalmenn í stjórn félagsins skipuðu 5 manna stjórn Blindravinnustofunnar ehf.
SUH lagði áherslu á að stjórnin verði ekki bráðabirgðastjórn og líti ekki á sig sem slíka.
ÁEG bendir á að stjórnarsetu fylgi ábyrgð.
KHE lýsti aðkallandi verkefnum nýrrar stjórnar. Nefndi samvinnuverkefni við Miðlun ehf um sölu á vörupökkum til fyrirtækja. Ráðningu á sölumanni. Ný verkefni við skönnun á ljósmyndum og fl.
SUH ræddi um tilgang reksturs BVS sem er bæði rekstrar- og félagslegur.
KS spyr um starfsmannaveltu hjá BVS. Þar var upplýst að margir starfsmenn hafa unnið lengi á vinnustofunni og vilji hafa það þannig.
ÁEG talaði um starfsþjálfunarhlutverk BVS. Sumir skilja þetta þannig að fólk eigi að stoppa stutt há BVS. Þetta sjónarmið henti ekki öllum starfsmönnum. Bendir á að mikil verðmæti sé ekki bara í vörumerki Blindravinnustofunnar, heldur einnig í starfsfólkinu.
ÓÞJ bendir á að það séu nokkrir lykilstarfsmenn sem haldi uppi starfsseminni.
ÁEG varar við þeim hugsunarhætti að fólk sé vistað á vinnustofunni í nokkurskonar dagsvistun.
KHE vill ekki einblína á starfsmannaveltu og endurhæfingarhlutverkið. Sumir vilji einfaldlega vinna þar lengi.
ÓH bendir á nokkra lykilþætti sem hafa verði í huga. Blindravinnustofan er vinnustaður og beri að líta á hana sem slíkan. Reksturinn þurfi að standa undir sér, annars verði hann ekki til frambúðar. Taka þurfi jafnframt tillit til sérstaklegra félagslegra þarfa starfsmannanna. Ekki megi líta á vinnustaðinn sem dagvistun fyrir starfsmenn. Þetta er vinnustaðurinn þeirra. Huga þurfi að aðkallandi verkefnum, svo sem Miðlunarverkefninu, uppbyggingu vörumerkisins og samningum við Vinnumálastofnum, komi til sameiningar við vinnustaði ÖBÍ.
HSG lýsir ánægju sinni með þessa umræðu. Vill gera þátt endurhæfingar i starfsseminni áberandi.
Hann styður að aðalstjórnarmenn í BF taki að sér að sitja í stjórn BVS.
Að lokum var samþykkt samhljóða að boðað skuli til hluthafafundar í Blindravinnustofunni ehf. þar sem lagt verði til að skipuð verði ný stjórn í félaginu. Hina nýju stjórn skulu skipa allir aðalstjórnarmenn Blindrafélagsins.
7. Vinnufundur stjórnar skal haldin að Sólheimum í Grímsnesi helgina 2. – 4. október.
Farið var yfir tilhögun dagskrár vinnufundarins en til umræðu og afgreiðslu verður stefnumótun Blindrafélagsins sem unnið hefur verið að frá því í byrjun þessa árs.
Ákveðið að allir aðal- og varastjórnarmenn taki þátt í vinnufundinum. Mökum verði boðið að dvelja að Sólheimum meðan á fundinum stendur.
Sameinginleg rútuferð verður frá Hamrahlíð kl. 17:00 á föstudag og farið verður aftur til Reykjavíkur á sunnudag um kl. 13:00.
Á föstudag verður kvöldfundur að loknum kvöldverði.
Á laugardag verður fundað allan daginn og stefnumótunarvinnan afgreidd.
Á laugardagskvöld verður hátíðarkvöldverður.
8. Rekstaryfirlit Blindrafélagsins janúar – ágúst 2009.
Framkvæmdastjóri fór lauslega yfir framlagt yfirlit. Samkvæmt því var tap á rekstri félagsins fyrstu 8 mánuði ársins um 11 m.kr. Ákveðið var að fresta umræðu um rekstraryfirlitið til næsta fundar.
- Önnur mál
a) ÓÞJ – Textun í sjónvarpi. Vill að þessi mál verði tekin upp við sjónvarpið þar sem leitað verði eftir þjónustu á þessu sviði. Samþykkt að ÓÞJ taki sjálfur að sér að kanna þetta hjá starfsmönnum sjónvarps.
b) HSG – Bendir á fyrirhuguð námskeið hjá Endurmenntun HÍ varðandi sáttmála SÞ og spyr í framhaldi hvort félagið eigi að niðurgreiða námskeiðin fyrir félagsmenn. Samþykkt að formaður taki að sér að koma með tillögur um þetta efni.
c) HSG – Vill athuga hvort æskilegt sé að fjölga gestaíbúðum fyrir félagsmenn í Hamrahlíð 17. Spyr einnig hvort eftirspurn sé eftir lausum íbúðum hjá félaginu. ÓH svarar og samþykkt var að hann kanni nýtingu á núverandi gestaíbúðum.
d) ÁEG – Sameining ríkisstofnanna. Hefur áhyggjur af því að hugmyndir séu uppi innan ríkiskerfisins um sameiningu ÞÞM við aðra ríkisstofnun. Telur líklegt í ljósi efnahagsástandsins að þessi staða geti komið upp. Málið nokkuð rætt og ákveðið að reynt skuli að hlera hvort nokkuð þessu líkt sé á döfinni.
Fleira var ekki gert og fundi slitið kl. 11:20
Fundargerð ritaði Ólafur Haraldsson
