7. stjórnarfundur Blindrafélagsins 2009 - 2010, haldinn 27. október 2009
- stjórnarfundur Blindrafélagsins starfsárið 2009 - 2010, haldinn þriðjudaginn 27. október 2009, kl. 09:15, í samkomusal félagsins að Hamrahlíð 17.
Mættir: Kristinn Halldór Einarsson (KHE) formaður, Ágústa Eir Gunnarsdóttir (AEG) varaformaður, Halldór Sævar Guðbergsson (HSG) gjaldkeri, Arnheiður Björnsdóttir (AB) meðstjórnandi, Kolbrún Sigurjónsdóttir (KS) varamaður, Lilja Sveinsdóttir (LS) varamaður, Ólafur Þór Jónsson (ÓÞJ) varamaður, Haukur Sigtryggsson (HS) varamaður og Ólafur Haraldsson (ÓH) framkvæmdastjóri.
Sigþór U Hallfreðsson (SUH) ritari kom til fundarins kl. 10:00.
- Fundarsetning
Formaður setti fundinn kl. 09:25 og bauð stjórnarmenn velkomna til fundarins.
- Dagskrá
Fyrirliggjandi dagskrá fundarins samþykkt. Engin beiðni kom um mál undir liðnum „Önnur mál“.
3. Fundargerð 6. stjórnarfundar
Samþykkt með lítilsháttar breytingum.
4. Bréf
a) Bréf hefur borist frá Þorkeli Steindal, æskulýðsfulltrúa með beiðni um að sækja ráðstefnu í Bratislava í Slóvakíu. Yfirheiti ráðstefnunnar er: „Tækni og auknir möguleikar í atvinnulífi fyrir ungt, blint og sjónskert fólk“. Ráðstefnan er styrkt af Evrópusambandinu. Þátttakendur þurfa einungis að greiða ferðakostnað sem er kr. 149.000 fyrir Þorkel ásamt fylgdarmanni.
Eftir stuttar umræður var samþykkt að Þorkell skyldi sækja umrædda ráðstefnu og Blindrafélagið greiddi umræddan kostnað.
b) Bréf hefur borist frá Derek Vaugham, félagsmanni á Akureyri þar sem hann fer fram á styrk frá Blindrafélaginu til að greiða kostnað vegna flugferða hundaþjálfara frá Skotlandi en Derek fékk leiðsöguhund frá skosku blindrasamtökunum fyrir um 3 árum síðan. Samþykkt samhljóða að greiða flugferðir í þetta sinn en síðan skal stefna að því að þessi leiðsöguhundur falli inn í sama prógram og leiðsöguhundarnir sem komu frá Noregi.
5. Skýrslur
a) Áðursend skrifleg skýrsla formanns yfirfarin og skýrð. Engar athugasemdir gerðar.
b) Skrifleg skýrsla framkvæmdastjóra var send út fundinn. Farið var yfir skýrsluna. Samþykkt tillaga framkvæmdastjóra um kaup á nýrri símstöð fyrir félagið en þess skuli gætt að hún sé aðgengileg fyrir sjónskerta.
6. Félagsfundur Blindrafélagsins
Formaður hóf umræðuna og lagði til að félagsfundur verði haldinn fimmtudaginn 12. nóvember, 2009 þar sem stefnumótum Blindrafélagsins verði kynnt. Samþykkt að halda fundinn á þessum tíma og formanni falið að finna fundarstjóra og fundarritara.
Einnig var samþykkt að halda eftirtalda kynningarfundi vegna stefnumótunarinnar:
· Foreldradeild – miðvikudaginn, 4. nóvember
· Norðurlandsdeild (á Akureyri) – fimmtudaginn, 5. nóvember
· Starfsfólk Blindrafélagsins – föstudaginn, 6. nóvember.
7. Rekstraryfirlit Blindrafélagsins
Rekstraryfirlit Blindrafélagsins fyrir fyrstu 8 mánuði ársins 2009 var lagt fram á 5. stjórnarfundi þann 22. september en umræðu um það frestað.
Nú er lagt fram til viðbótar yfirlit um stöðu Verkefnasjóðs félagsins. Þegar millifært hefur verið milli sjóðsins og félagsins vegna þegar samþykktra verkefna, lækkar tap af rekstri félagsins samkvæmt yfirlitinu úr kr. 11.326.000 niður í kr. 9.781.000.
Til viðbótar leggur framkvæmdastjóri til að eftirtaldir rekstrarliðir verði færðir af rekstri félagsins yfir í Verkefnasjóð:
a) Stefnumótunarvinna Blindrafélagsins (þegar greitt kr. 952.873)
b) Framlag v/sumarbúða Ungblind (allt að kr. 500.000 – ennþá ófært í rekstur)
c) 70 ára afmælishóf Blindrafélagsins (þegar greitt kr. 998.362)
d) Gerð og smíði samfélagslampans (þegar greitt kr. 317.663)
e) Bæklingurinn „Við saman“ (þegar greitt kr. 1.010.653).
Ofangreindar tölur eru staða þessara kostnaðarliða nú, en upphæðir geta breyst þegar fullnaðaruppgjör vegna þeirra hefur farið fram.
Eftir stutta umræðu var tillaga framkvæmdastjóra um að áðurnefnd verkefni (liðir a – e) verði greidd af Verkefnasjóði félagsins, samþykkt samhljóða.
Að teknu tilliti til þessarar samþykktar, er reiknað tap af rekstri félagsins janúar – ágúst 2009, kr. 6.502.000.
8. Viðræður um sameiningu Blindravinnustofunnar og vinnustaða ÖBÍ.
Formaður hóf umræðuna og tilkynnti að ekki hafi náðst samstaða um að halda sameiningarviðræðum við ÖBÍ áfram um sameiningu vinnustaða félaganna. Þeim hafi því verið hætt að frumkvæði ÖBÍ.
KHE, HSG og ÓH tóku til máls og skýrðu fyrir stjórnarmönnum hvaða atriði hefðu öðrum fremur leitt til þessarar niðurstöðu.
Eftir stuttar umræður samþykkti stjórnin fyrir sitt leiti að rétt hafi verið að slíta viðræðunum og hvatti til þess að starfsfólk vinnustofunnar verði tilkynnt fljótt um þessa niðurstöðu.
9. Málefni Tölvumiðstöðvar fatlaðra
Formaður tók fyrstur til máls og tilkynnti að Sjálfsbjörg hafi dregið sig út úr Tölvumiðstöðinni og muni því ekki framvegis taka þátt í stjórn hennar eða veita til hennar fé.
Eftir nokkrar umræður var samþykkt að Blindrafélagið muni halda sig við ákvörðun 6. stjórnarfundar um að greiða Tölvumiðstöðinni styrk að upphæð kr. 300.000.
Að lokum var samþykkt að tilnefna Halldór Sævar Guðbergsson sem nýjan stjórnarmann félagsins í Tölvumiðstöð fatlaðra.
10. Námskeið á vegum Endurmenntunar Háskóla Íslands um sáttmála SÞ um réttindi fatlaðs fólks.
Upplýst var að umrætt námskeið verði haldið laugardaginn 28. nóvember. Verð er kr. 15.000.
Samþykkt að hvetja starfsmenn félagsins og stjórnarmenn að sækja námskeiðið og verði það þeim að kostnaðarlausu.
Ennfremur var samþykkt að niðurgreiða námskeiðið um 50% fyrir félagsmenn. Í upphafi skal þetta auglýst á miðlum félagsins þar sem 10 félagsmönnum verði boðin þessi kjör. Heimilt er að bjóða fleiri félagsmönnum samskonar kjör, verði undirtektir góðar.
- Önnur mál
Ekkert var á dagskrá undir þessum lið.
Fleira var ekki gert og fundi slitið kl. 11:00
Fundargerð ritaði Ólafur Haraldsson
