9. stjórnarfundur Blindrafélagsins 2009 - 2010, haldinn 30. nóvember 2009

9. stjórnarfundur Blindrafélagsins starfsárið 2009 - 2010, haldinn mánudaginn, 30. nóvember 2009,  kl. 16:30 í samkomusal félagsins að Hamrahlíð 17.

Mættir: Kristinn Halldór Einarsson (KHE) formaður, Ágústa Eir Gunnarsdóttir (AEG) varaformaður, Halldór Sævar Guðbergsson (HSG) gjaldkeri, Sigþór U Hallfreðsson (SUH) ritari, Arnheiður Björnsdóttir (AB) meðstjórnandi, Kolbrún Sigurjónsdóttir (KS) varamaður, Lilja Sveinsdóttir (LS) varamaður,  Ólafur Þór Jónsson (ÓÞJ) varamaður, Haukur Sigtryggsson (HS) varamaður og Ólafur Haraldsson (ÓH) framkvæmdastjóri.

1. Fundarsetning

Formaður setti fundinn kl. 16:40 og bauð stjórnarmenn og gest fundarins, Þorkel Jóhann Steindal (ÞJS), æskulýðsfulltrúa Blindrafélagsins velkomin til fundarins.

2. Æskulýðsfulltrúi Blindrafélagsins, starf og áherslur

Formaður kynnti ÞJS fyrir stjórnarmönnum og bað hann að skýra frá helstu verkefnum sínum síðan hann hóf störf hjá Blindrafélaginu.

ÞJS tók til máls og fór ítarlega yfir helstu verkefni sín hjá félaginu. Hann sagði frá eftirtöldum verkefnum:

• Norrænum sumarbúðum sem haldnar voru s.l. sumar og tókust vel.
• Vinnu með stjórn Ungblindar um hugmyndafræði og stefnumótun. Þar er m.a. hugað að lagabreytingum. Markmið er að unga fólkið sinni sínum málum sjálft eins og kostur er.
• Ungmennaskiptum næsta sumar.
• Fyrirhugaðri sölu á skartgrip. Verslunin Leonard mun selja hálsmen fyrir jólin þar sem sjóðurinn „Blind börn á Íslandi“ fær ágóðahlut af sölunni.
• Námskeiðum sem hafa verið haldin eða verða haldin, m.a.  í samvinnu við Þjónustu- og þekkingarmiðstöð, svo sem:
• • Myndlist
  • Stafagleði – markmiðið er að gera stafina flotta fyrir börnin.
  • Líkamsbeiting og tjáning – markmiðið er að kenna blindu fólki „body language“. Blindum hættir til að temja sér slæma líkamsstöðu og tjáningu (svo sem að brosa ekki á réttum tíma og fl.).
  • Kynslóðabilið brúað – Ungt fólk aðstoðar þá eldri varðandi tækni og fær í staðinn hlutdeild í reynsluheimi þeirra fullorðnu.
  • Hreyfing og líkamsrækt.
  • Matargerð.
  • Förðun.

Megnið af vinnu æskulýðsfulltrúa hefur farið í unglingana en meiri áhersla mun verða á börnin á næstunni.

Stjórnarmenn lýstu ánægju sinni með starf æskulýðsfulltrúa.

HSG hvetur til þess að börnin fái að taka vini sína með sér í starfið. Vill aukið samstarf við ÞÞM.

ÓÞJ kveðst vera ánægður með starfið.

Æskulýðsfulltrúi var beðinn að skila skriflegri skýrslu um ferð sína til Bratislava í Slóvakíu nýverið.

Að lokum þakkaði formaður æskulýðsfulltrúa fyrir greinargóð svör, gott starf og komuna á fundinn.

Að því loknu yfirgaf ÞJS fundinn.

3. Dagskrá

Fyrirliggjandi dagskrá fundarins samþykkt. Eftirtaldar beiðnir komu fram um mál til umfjöllunar undir liðnum „Önnur mál“:

HSG – Sáttmáli SÞ

LS – NKK fundur á næsta ári.

4.    Fundargerð 8.  stjórnarfundar

Fáeinar athugasemdir voru skráðar við fundargerðina. Fundargerðin var þannig samþykkt og ákveðið að hún verði send stjórnarmönnum með gerðum breytingum.

5.    Bréf

a)    Birkir Gunnarsson hefur sent bréf um punktaletursráðstefnu Norðurlanda sem haldin verður hér á landi á næsta ári. Skipulag og undirbúningur ráðstefnunnar verður á herðum ÞÞM með aðstoð frá Norðmönnum. Í bréfinu er ekki verið að biðja Blindrafélagið um fjárhagslegan stuðning við ráðstefnuna heldur hugsanlega aðstoð við undirbúning. Einnig er reiknað með að Blindrafélagið sendi fulltrúa á ráðstefnuna. Verið er að kanna hvort dagarnir 27. og 28. maí geti verið heppilegir ráðstefnudagar.

HSG og ÁEG bjóðast til að taka þátt í þessu verkefni og var það samþykkt.

b)    Trimmklúbburinn Edda hefur sent stjórninni bréf varðandi lán Blindrafélagsins á samkomusalnum til klúbbsins. Formaður og framkvæmdastjóri lýstu því að þetta mál væri útkljáð. Stjórnarmenn sem tóku til máls töldu að trimmklúbburinn hefði betur látið ógert að skrifa umrætt bréf.

c)    ÖBÍ hefur sent Blindrafélaginu bréf þar sem þess er óskað að félagið tilnefni fulltrúa í afmælisnefnd ÖBÍ. Samþykkt samhljóða að óska þess við Gísla Helgason að hann taki þetta að sér.

6.    Skýrslur

a)    Formanns – Skrifleg skýrsla var send út fyrir fundinn. Skýrði hann nánar fáein atriði í skýrslunni

b)    Framkvæmdastjóra – Skrifleg skýrsla var send út fyrir fundinn. Í skýrslunni var m.a. sagt frá viðræðum framkvæmdastjóra við forstjóra ÞÞM um nýjan húsaleigusamning milli Blindrafélagsins og stofnunarinnar. Samþykkt var samhljóða að heimila framkvæmdastjóra að ljúka gerð samningsins á þeim nótum sem kynntar voru.

7.    Umsögn um drög að reglugerð fyrir úthlutun hjálpartækja

Upplýst var að stjórnarnefndin sem fjallar um drögin verði tilbúin með texta á næsta fundi, þ.e. 14. des. Athugasemdum um reglugerðina þarf að skila í síðasta lagi 15. desember.

8.    Styrktarmannakerfi Blindrafélagsins og söfnun nýrra styrktarfélaga

KHE kynnti áður send skjöl um uppbyggingu lagskipts styrktarmannakerfis. Hugmyndirnar voru nokkuð ræddar og voru menn almennt spenntir fyrir hugmyndunum. Nokkrir fyrirvarar voru gerðir um einstök atriði, til að mynda var andstaða við það að gullampi félagsins verði notaður sem viðurkenning fyrir fjárstuðning.

Samþykkt að KHE, HSG og ÓH vinni málið áfram.

9.    Nýjar hugmyndir varðandi sölu á Þríkrossinum.

Formaður skýrði frá því að nemandi í H.Í. (Karl Eiríksson) hafi fjallað um markaðssetningu og  sölu á Þríkrossinum erlendis (nánar tiltekið á Ítalíu) í BA-prófs ritgerð í viðskiptafræði. Karl hefur áhuga á því að reyna sjálfur fyrir sér þar syðra varðandi sölu Þríkrossins. Ekki yrði um fjárhagslega þátttöku Blindrafélagsins í verkefninu að öðru leiti en því að félagið seldi honum krossa gegn staðgreiðslu til sölu á Ítalíu. Gert er ráð fyrir lágri  álagningu Blindrafélagsins af þessum viðskiptum. Hugmynd hefur komið fram um að blindrasamtökin á Ítalíu fengju einhverja þóknun af þessari sölu en um slíkt hefur ekki verið samið. Ef af yrði, þá væri söluaðilinn, þ.e. Karl ábyrgur fyrir þeirri þóknun.

Allmargir stjórnarmenn tóku til máls um þessa hugmynd og sýndist sitt hverjum. Að lokum var samþykkt að vinna málið áfram og að áreiðanleiki Karl Eiríkssonar verði kannaður.

10. Önnur mál

Eftirtalin mál voru tekin til umræðu:

a)    Sáttmáli SÞ – HSG lagði til að Blindrafélagið skrifaði bréf til félagsmálaráðuneytisins og spyrði hvernig ráðuneytið hafi hugsað sér að standa að kynningu á sáttmálanum meðal almennings.  I framhaldi af þessu spannst umræða um sáttmálann þar sem HSG lagði fram eftirtaldar spurningar:

·         Á félagið að fá lagalega ráðgjöf til að kynna félagsmönnum hversu mikið sé raunhæft að beita sáttmálanum í baráttu fyrir réttindum blindra og sjónskertra?

·         Á Blindrafélagið að móta eigin kynningarstefnu varðandi sáttmálann?

Samþykkt var að leita til Ragnars Aðalsteinssonar hrl.  til að fá leiðbeiningar varðandi beitingu sáttmálans í baráttumálum félagsins.

b)    NKK ráðstefna 2010 – LS óskar þess að hún og AB fari á NKK þing sem haldið verður á næsta ári. Samþykkt að þetta sé mál kvennadeildar að ákveða og fjármagna.

c)    HS – Vill að hjólastólar og göngugrindur sem blindir og sjónskertir nota, verði merktir með merki sem sýni hvítan staf. Formaður minnti á að félagið hefði á boðstólum auðkennandi barmmerki sem félagsmenn geti fengið gegn vægu verði. Engin samþykkt gerð varðandi þetta.

d)    Kaup á höfundarrétti á Þríkrossinum – Samþykkt samhljóða að veita framkvæmdastjóra heimild til semja við Guðlaugu Konráðsdóttur um kaup félagsins á höfundarrétti Þríkrossins. Samningur þar um verði borin undir stjórn til samþykktar áður en frá honum verður gengið.

Fleira var ekki gert og fundi slitið kl. 19:00

Fundargerð ritaði Ólafur Haraldsson