12. stjórnarfundur Blindrafélagsins starfsárið 2009 - 2010, haldinn 9. febrúar 2010.
12. stjórnarfundur Blindrafélagsins starfsárið 2009 - 2010, haldinn þriðjud. 9. febrúar, kl. 16:30 í samkomusal félagsins að Hamrahlíð 17.
Mættir: Kristinn Halldór Einarsson (KHE) formaður, Ágústa Eir Gunnarsdóttir (AEG) varaformaður, Sigþór U Hallfreðsson (SUH) ritari, Halldór Sævar Guðbergsson (HSG) gjaldkeri, Kolbrún Sigurjónsdóttir (KS) varamaður, Ólafur Þór Jónsson (ÓÞJ) varamaður, Haukur Sigtryggsson (HS) varamaður og Ólafur Haraldsson (ÓH) framkvæmdastjóri.
Forföll vegna setu á NKK fundi: Arnheiður Björnsdóttir (AB) meðstjórnandi og Lilja Sveinsdóttir (LS) varamaður.
- Fundarsetning
Formaður setti fundinn kl. 16:45 og bauð stjórnarmenn velkomna til fundarins.
- Dagskrá fundarins og önnur mál
Fyrirliggjandi dagskrá fundarins samþykkt. Eftirtaldar beiðnir komu fram um mál til umfjöllunar undir liðnum „Önnur mál“:
HSG - NVITER
HSG – Fyrirhuguð námskeið á vegum ÞÞM
3. Fundargerð 11. stjórnarfundar
Samþykkt samhljóða.
4. Bréf
a) Bréf hefur borist frá Íþróttasambandi fatlaðra dags. 27. jan. 2010 þar sem óskað er eftir styrk frá Blindrafélaginu til Sumarbúða fatlaðra sem haldin hafa verið á hverju sumri síðan 1986. Beiðnin hljóðar upp á kr. 50.000 sem nemur þátttökugjaldi fyrir einn aðstoðarmann. Blindrafélagið hefur veitt samsvarandi styrki til sumarbúðanna mörg undanfarin ár.
Samþykkt samhljóða að veita umbeðinn 50.000 kr. styrk.
5. Skýrslur
a) Formaður lagði fram skriflega skýrslu og fór yfir helstu atriði hennar á fundinum. Engin samþykkt gerð.
b) Framkvæmdastjóra – Skrifleg skýrsla var send út fyrir fundinn. Farið var yfir helstu atriði hennar.
· HSG lýsti ánægju sinni með kaup félagsins á höfundarrétti og vörumerki Þríkrossins en kaupsamningur þar um var undirritaður við Guðlaugu Konráðsdóttur og dóttur hennar 5. feb. 2010. Aðrir stjórnarmenn tóku undir með Halldóri.
· HSG sagðist sem fulltrúi búsettur á landsbyggðinni í stjórn félagsins styðja hugmyndir framkvæmdastjóra um fjölgun gestaíbúða í húsinu. Ákveðið að málið verði rætt síðar í stjórninni þegar hugmyndir eru betur mótaðar og hagkvæmniskönnun hefur verið gerð.
6. Íslenskir talþjónar
Formaður tók til máls og kynnti verkefni sem hann og nokkrir aðrir nemendur í Endurmenntun Háskóla Íslands hafa unnið að. Verkefnið fjallar um nauðsyn þess og hagkvæmni að gerður verði nýr íslenskur rafrænn talþjónn fyrir tölvur og önnur tölvustýrð tæki. Lýsti hann verkefninu í aðalatriðum og fór yfir þá valkosti sem virðast vera í boði. Talaði hann um 4 erlend fyrirtæki sem framleiða slíka talþjóna, en þau eru:
· IVONA – pólskt fyrirtæki sem hefur m.a. verið í samstarfi við RNIB í Bretlandi um þróun talþjóna með þarfir blindra í huga. Taldir sanngjarnir í samningum og verði.
· ACAPELA – sænskt fyrirtæki sem hefur langa reynslu í gerð talþjóna, hannaði m.a. íslensku talþjónana „Sturlu“ og „Snorra“.
· LOQUENDO – ítalskt fyrirtæki sem hefur framleitt talþjóna í 30 ár. Eru taldir mjög góðir og hafa fengið mörg verðlaun. Mjög flottir talþjónar er þykja mjög dýrir.
· NUANCE – alþjóðlegt fyrirtæki með mikla reynslu. Framleiddu og eiga réttinn á „Röggu“.
Undirbúningskostnaður vegna verkefnisins er talinn á bilinu 10 – 12 m.kr en framleiðslukostnaður talþjónsins um 25 - 27 m.kr (Ivona, Nuance og Acapela), upp í 80 m.kr. (Loquendo).
Aðrir stjórnarmenn sem tóku til máls lýstu sig mjög spennta fyrir verkefninu og töldu að Blindrafélagið ætti að hafa forystu um slíka framkvæmd og fá aðra í lið með sér varðandi fjármögnun.
ÁEG lagði til að stofnaður verði starfshópur um verkefnið.
HS spyr hvernig þessir talþjónar myndu hljóma á íslensku?
KHE fór yfir þá aðferðarfræði sem helst er notuð við hönnun og framleiðslu á talþjónum og í hverju mismunandi aðferðir væru fólgnar. Í framhaldi af því hlustuðu menn á talþjóna á ensku frá þessum fyrirtækjum.
HSG sagðist vera hlynntur verkefninu og sammála því að starfshópur verði skipaður um framhaldið.
KHE taldi að fyrst um sinn væri skynsamlegt að verkefnið væri á borði stjórnarinnar meðan það væri í vinnslu hjá nemendahópnum.
Ákveðið að vinnan færi áfram fram á vegum stjórnarinnar.
7. Fundaráætlun stjórnar fram að aðalfundi
Formaður lagði fram eftirfarandi fundaráætlun fram að aðalfundi:
Stjórnarfundir:
Þriðjudaginn 10. febrúar, kl 16:30
Þriðjudaginn 23. febrúar, kl 16:30
Þriðjudaginn 16. mars, kl 16:30
Þriðjudaginn 30. mars, kl 16:30
Þriðjudaginn 20. apríl, kl 16:30
Þriðjudaginn 4. maí, kl 16:30
Þriðjudaginn 11. maí, kl 16:30
Félagsfundir:
Fimmtudagurinn 25. mars, kl 17:00
Möguleg fundarefni:
Nýtt styrktarfélagakerfi, talþjónaverkefni
Aðalfundur Blindrafélagsins:
Laugardagurinn 15. maí, kl 10:00
Fundaráætlunin var samþykkt að öðru leiti en því að ekki var ákveðin dagsetning fyrir aðalfund félagsins. Töldu menn einnig koma til greina að halda hann á fimmtudegi, t.d. 13. eða 20. maí.
8. Breytingar á styrktarmannakerfi Blindrafélagsins
Formaður fór yfir tillögur sem liggja fyrir um lagskipt styrktarmannakerfi. Í tillögunni er gert ráð fyrir fjórskiptu kerfi sem verði þannig upp byggt:
· Þrep 1 – Þeir sem greiða einfalt félagsgjald á ári
· Þrep 2 – Þeir sem greiða tvöfalt félagsgjald á ári
· Þrep 3 – Þeir sem greiða fjórfalt félagsgjald á ári
· Þrep 4 – Þeir sem greiða mánaðarlega félagsgjald ( 12 falt).
Einnig er gert ráð fyrir að styrktarfélagar og góðvinir verði framvegis kallaðir „Bakhjarlar Blindrafélagsins“.
Bakhjarlar munu njóta hlunninda frá félaginu sem umbun fyrir framlög sín til félagsins. Hlunnindin verða stighækkandi eftir þrepum en allir bakhjarlar verða sjóntryggðir á sama hátt og styrktarfélagar og góðvinir eru nú. Viðbótar hlunnindi munu fylgja þrepum ofar í keðjunni.
Huga þarf að tölvukerfi sem getur haldið utan um styrktarmannakerfið og gæta þarf þess að það henti sjónskertum. Einnig þarf að huga að því hvort þetta nýja styrktarmannakerfi kalli á breytingar á lögum félagsins.
Ákveðið var að halda þessari vinnu áfram.
9. Samsetning stjórnar Blindravinnustofunnar – framhald frá síðasta fundi
Formaður og varaformaður tóku til máls og rifjuðu upp umræðuna á síðasta fundi. HSG lagði áherslu á að góð tenging verði milli stjórna félagsins og stjórnar BVS.
Þau ÁEG, HSG og SUH lýstu sig reiðubúin að halda áfram stjórnarsetu í BVS.
Ákveðið var að fresta frekari umræðum um málið þar til síðar og stefnt skuli að því að ný stjórn verði kjörin á næsta aðalfundi Blindravinnustofunnar.
10. Tillögur innan ÖBÍ um úthlutun styrkja til aðildarfélaga
Í upphafi bað formaður HSG að kynna tillögur sem lagðar hafa verið fram í stjórn ÖBÍ um nýjar reglur við úthlutun styrkja ÖBÍ til aðildarfélaga sinna.
HSG fór yfir tillögurnar og að því loknu var samþykkt að hann færi með atkvæði félagsins við mótun og samþykkt á nýjum úthlutunarreglum.
- Önnur mál
Eftirtalin mál voru tekin til umræðu:
a) SUH – Lagði til að ekki verði lengur talað um hjálpartækjaverslun Blindrafélagsins en í stað verði verslunin kölluð „Sérvöruverslun“. Hugmyndin fékk góðar undirtektir. Engin samþykkt gerð.
b) HSG – Sagði frá fyrirhuguðum námskeiðum á vegum ÞÞM sem haldin verða fyrir blinda og sjónskerta 25. – 26. febrúar n.k. í Hamrahlíð 17. ÞÞM sótti um ferðastyrk til TR fyrir væntanlega þátttakendur utan af landi en þeirri beiðni verður að líkindum hafnað. Óskaði hann þess að Blindrafélagið hlypi undir bagga og greiddi fargjöld til Reykjavíkur fyrir félagsmenn sem sækja vildu námskeiðið. Beiðnin var samþykkt samhljóða.
c) HSG – Sagði frá NVIDER sem eru alþjóðleg samtök þjónustumiðstöðva fyrir blinda og sjónskerta. Samtökin munu halda kynningarfund og starfsdag hér á landi 12. mars n.k. Óskaði hann þess að Blindrafélagið tæki á móti stjórn samtakanna að kvöldi þess dags og byði henni í kvöldverð. Einnig bauð hann stjórn Blindrafélagsins og starfsfólki þess sem vinnur að félagsmálum að taka þátt í starfsdeginum.
Samþykkt var að taka boðinu um þátttöku í starfsdeginum og bjóða stjórn samtakanna i kvöldverð.
Fleira var ekki gert og fundi slitið kl. 18:30
Fundargerð ritaði Ólafur Haraldsson
