13. stjórnarfundur Blindrafélagsins starfsárið 2009 - 2010, haldinn 23. febrúar 2010

Mættir: Kristinn Halldór Einarsson (KHE) formaður, Ágústa Eir Gunnarsdóttir (AEG) varaformaður, Sigþór U Hallfreðsson (SUH) ritari, Halldór Sævar Guðbergsson (HSG) gjaldkeri,  Arnheiður Björnsdóttir (AB) meðstjórnandi, Kolbrún Sigurjónsdóttir (KS) varamaður, Lilja Sveinsdóttir (LS) varamaður, Haukur Sigtryggsson (HS) varamaður og Ólafur Haraldsson (ÓH) framkvæmdastjóri.

1. Fundarsetning

Formaður setti fundinn kl. 16:40 og bauð stjórnarmenn velkomna til fundarins.

2. Dagskrá fundarins og önnur mál

Fyrirliggjandi dagskrá fundarins samþykkt. Eftirtaldar beiðnir komu fram um mál til umfjöllunar undir liðnum „Önnur mál“:

            KHE – IVIS, Verkefni um aðgengi að netinu

            HSG – Tölvukennsla blindra og sjónskertra

3.    Fundargerð 12.  stjórnarfundar

Samþykkt samhljóða.

4.    Bréf

a)    Stefnumót við þriðja geirann. Bréf hefur borist frá Heilbrigðisráðuneytinu dags. 27. jan. s.l. þar sem félaginu er boðið að senda einn til þrjá fulltrúa á ráðstefnu sem ráðuneytið boðar til 24. mars n.k. undir fyrirsögninni „Stefnumót við þriðja geirann“.

KHE, AB og LS lýsa sig reiðubúin til að sækja ráðstefnuna og var það samþykkt.

b)    Bréf dags 11. feb. s.l. hefur borist frá ÖBÍ þar sem afrakstur stefnumótunarvinnu bandalagsins undir heitinu „Svona vinnum við“ er kynntur. Þar eru talin upp 13 meginviðmið bandalagsins varðandi samskipti og umræðu innan ÖBÍ. Viðmiðin bárust einnig sem innrammað skjal og verður því komið fyrir í afgreiðslu félagsins.

5.    Skýrslur

a)    Formaður lagði fram skriflega skýrslu og fór yfir helstu atriði hennar á fundinum.

·         Varðandi fyrirhugaða útleigu á hjálpartækjum var samþykkt að kalla starfssemina „Sérhæfða tækjaleigu Blindrafélagsins“

·         Samþykkt var að fara yfir verkefnaskrá félagsins á næsta fundi. Um er að ræða skrá sem varð til við stefnumótunarvinnu félagsins á síðasta ári.

b)    Framkvæmdastjóra – Skrifleg skýrsla var send út fyrir fundinn. Farið var  yfir helstu atriði hennar. Engar athugasemdir eða samþykkt gerð.

6.    Íslenskir talþjónar – framhald frá síðasta fundi

Fyrir fundinn hafði formaður sent stjórnarmönnum skýrslu sem hann og 3 aðrir nemendur í Endurmenntun HÍ lögðu fram um íslenskan talþjón. Í skýrslunni er gengið út frá því að einn aðiði (Blindrafélagið) fari með eigendaábyrgð á verkefninu.

Spurði hann aðra stjórnarmenn hvort Blindrafélagið ætti að taka forystu um framkvæmd verkefnisins?

Æskilegir samstarfsaðilar gætu verið: Þjónustu- og þekkingarmiðstöð, Blindrabókasafnið, ÖBÍ, aðili úr hópi tölvuleikjaframleiðenda, Menntamálaráðuneytið, fulltrúi frá fræðasamfélaginu (t.d. íslenskudeild HÍ).

Síðan var farið yfir aðferðarfræði verkefnisins í aðalatriðum, rætt um hvenær því gæti verð lokið og „Dagur íslenskrar tungu“ (16. október) nefndur sem æskilegur kynningardagur. Næsta skref ætti að vera kynning á verkefninu fyrir hagsmunaaðilum.

SUH tók næstur til máls og taldi að fyrsta skrefið hafi verið tekið með þeirri forkönnun sem skýrslan er. Næsta skref ætti að vera ákvörðun um hvort fara eigi af stað eða ekki.

KHE telur rökrétt sem næsta skref að stofna stýrihóp. Hann telur einnig að Blindrafélagið eigi að vera eigandi talþjónsins. Meðal þess sem taka þarf ákvörðun um er val á framleiðanda, fjármögnun (gerð fjárhagsáætlunar), gerð kynningaráætlunar og samningamál.

Miklar umræður spunnust um málið.

HSG fagnaði skýrslunni og spyr hvað talþjónninn „Ragga“ hafi kostað?

KHE – Ítrekar að skipa þurfi stýrihóp sem kanni hvort þetta sé framkvæmanlegt.

ÓH – spyr hvort ganga skuli út frá því í byrjun að Blindrafélagið verði eigandi talþjónsins eða hvort stýrihópurinn eigi að fjalla um það atriði?

HS – spyr hversu margir notendur talþjónsins geta orðið og hvað talþjónninn muni kosta fyrir hvern notanda?

Að lokum var ákveðið að KHE, ÁEG og ÓH myndi undirbúningshóp sem hafi það hlutverk að tala við hagsmunaaðila og kanni áhuga þeirra fyrir verkefninu.

7.    Aðalfundur Blindrafélagsins 2010.

Samþykkt var að halda aðalfund félagsins fimmtudaginn 13. maí 2010 (Uppstigningardag) , og skuli hann hefjast kl. 10 árdegis.

8.    Þríkrossinn og markaðssetning á Ítalíu

Formaður lagði til að tilboði KE um sölu og markaðssetningu á Þríkrossinum á Ítalíu verði tekið.

HSG – sagðist ekki vera sannfærður um að umræddur maður eða hans tilboð væri réttur kostur fyrir félagið.

SUH sagðist einnig vera í vafa um að þetta væri góður kostur og velti fyrir sér áhættu félagsins.

ÓH taldi að félagið tæki litla áhættu varðandi þetta tilboð þar sem ekki er gert ráð fyrir neinum lánsviðskiptum við KE. Fjárhagsleg áhætta væri því öll hans. Girða mætti fyrir önnur áhættuatriði í samningi við KE.  Hvort hann sjálfur (ÓH) tryði á sigur varðandi þetta verkefni væri annað mál.

HS taldi að félagið ætti að fara sér hægt í þessu máli þar sem það væri fordæmisgefandi.

Að lokum var samþykkt að SUH, HSG, AB og ÁEG hitti hjónin á fundi og meti sjálf kosti þeirra og galla. ÓH boði til fundarins.

9.    Úthlutun úr Námssjóði Blindra

Framkvæmdastjóri kynnti stöðu sjóðsins. Um áramótin voru kr. 6.110.000 í sjóðnum. Á síðasta ári var ávöxtun kr. 702.000 en úthlutað var kr. 625.000 í styrki. Á þessu ári má búast við ávöxtun upp á um  kr. 600.000.

6 umsóknir liggja fyrir til afgreiðslu nú og hefur framkvæmdastjóri og ráðgjafi félagsins metið þær allar gildar og verðskulda styrk úr hærri úthlutunarflokki.

Lagt er til að þessar 6 umsóknir fái 50.000 kr styrk hver.

Samþykkt samhljóða.

10. Styrkir og sjóðir innan félagsins

Formaður lagði fram yfirlit um styrki og sjóði innan félagsins.  Ræddi hann hvort efni væru til að sameina einhverja þessa sjóði og um leið skilgreina nánar hvaðan aðrir styrkir kæmu.

Eftir nokkra umræðu var ákveðið að nauðsynlegt væri að finna afmælisgjöf Blindravinafélagsins frá síðasta ári ákveðin farveg. Einnig þyrfti að víkka út tilgang Minningarsjóðs Margrétar Jónsdóttur sem hefði svo þröngt svið í dag að nánast væri útilokað að finna honum verkefni til að styrkja.

ÓH falið að koma með tillögur í þessum 2 málum og tala við fulltrúa úr fjölskyldu Margrétar Jónsdóttur varðandi breytingar á skipulagsskrá sjóðsins.

11. Blindravinnustofan. Skipun í næstu stjórn.

KHE lagði fram nokkur nöfn sem skipað gæti næstu stjórn Blindravinnustofunnar. Í tillögunni er gert ráð fyrir að stjórnarmaður komi frá ÞÞM. Ekki var endanlega gengið frá tillögu um stjórnarskipunina en samþykkt að koma boðum til stjórnar BVS um að aðalfundur vinnustofunnar verði haldinn um eða upp úr 20. mars n.k.

12. Önnur mál

Eftirtalin mál voru tekin til umræðu:

a)    KHE – IVIS, þ.e. verkefni um aðgengi á netinu. Það gerir ráð fyrir norrænni vefsíðu þar sem blindir og sjónskertir geti skipst á upplýsingum. Þetta er tilraunaverkefni í 2 ½ ár og beðið er um að Blindrafélagið taki þátt í því með því að leggja vinnuframlag til verkefnisins. Samþykkt að fela Birki Rúnari Gunnarssyni að taka þátt í verkefninu fyrir hönd Blindrafélagsins.

b)    HSG – Tilkynnti að hann væri kominn í stjórn Tölvumiðstöðvar fatlaðra. Vill bjóða upp á tölvunámskeið fyrir blinda og sjónskerta í samvinnu við tölvumiðstöðina. Stjórnarmenn lýstu ánægju sinni með það.

c)    KS – minnti á að Handbók Blindrafélagsins með félaga- og símaskrá félagsins væri orðin gömul (útgefin árið 2000) og spyr hvort ekki sé nauðsynlegt að gefa út nýja. Aðrir stjórnarmenn töldu ekki þörf fyrir slíka skrá þar sem þessar upplýsingar væru aðgengilegar á annan hátt.

Fleira var ekki gert og fundi slitið kl. 19:30