15. stjórnarfundur Blindrafélagsins starfsárið 2009 - 2010, haldinn 30. mars 2010.
15. stjórnarfundur Blindrafélagsins starfsárið 2009 - 2010, haldinn þriðjud. 30. mars, kl. 16:30 í samkomusal félagsins að Hamrahlíð 17.
Mættir: Kristinn Halldór Einarsson (KHE) formaður, Ágústa Eir Gunnarsdóttir (AEG) varaformaður, Sigþór U Hallfreðsson (SUH) ritari, Arnheiður Björnsdóttir (AB) meðstjórnandi, Kolbrún Sigurjónsdóttir (KS) varamaður, Haukur Sigtryggsson (HS) varamaður, Ólafur Þór Jónsson (ÓÞJ) varamaður og Ólafur Haraldsson (ÓH) framkvæmdastjóri.
Í símanum frá Akureyri: Halldór Sævar Guðbergsson (HSG) gjaldkeri,
- Fundarsetning
Formaður setti fundinn kl. 16:40 og bauð stjórnarmenn velkomna til fundarins.
- Dagskrá fundarins og önnur mál
Fyrirliggjandi dagskrá fundarins samþykkt.
3. Fundargerð 14. stjórnarfundar
Samþykkt samhljóða.
4. Bréf
a) Erindi hefur borist frá Hönnu Björg Sigurjónsdóttur, lektor í fötlunarfræðum við HÍ með beiðni um að félagið niðurgreiddi námskeiðarkostnað fyrir félagsmenn sína í námskeiðinu: „Fötlun í listum, menningu og fjölmiðlun“ á tímabilinu 12. – 29. apríl 2010. Almennt þátttökugjald á námskeiðið er kr. 29.900. Samþykkt var að niðurgreiða námskeiðið um 15.000 kr. fyrir allt að 7 félagsmenn.
b) Annað erindi hefur borist frá Hönnu Björg Sigurjónsdóttur, lektor í fötlunarfræðum við HÍ þar sem hún segir frá verkefni sem felur í sér rannsókn á stöðu fatlaðra nemenda við HÍ sem hún vinnur að í samstarfi við Brynhildi Flovens, dósent í lögfræði. Verkefnið verður unnið af nemendum í BA, MA og doktorsnámi og kostað að hluta af Nýsköpunarsjóði námsmanna. Styrkir þaðan duga ekki til og því þarf Hanna að útvega viðbótarfjármagn að upphæð kr. 740.000 til að halda doktorsnemunum inni í verkefninu. Sækir hún um styrk til Blindrafélagsins að upphæð kr. 140.000 – 360.000 til að brúa þetta bil.
Eftir nokkrar umræður var samþykkt að veita kr. 140.000 kr til verkefnisins úr Verkefnasjóði félagsins.
c) Svar hefur borist frá Félagsmálastjóra Kópavogs þar sem erindi félagsins um ferðaþjónustu fyrir lögblinda Kópavogsbúa að reykvískri fyrirmynd var synjað og bent sem áður á ferðaþjónustu fatlaðra í bænum. Samþykkt var að óska eftir upplýsingum um kostnað pr. ferð í ferðaþjónustu fatlaðra þar í bæ.
d) Lagður fram tölvupóstur frá Baldri Gylfasyni hjá ÞÞM þar sem skýrt er frá því að undanfarið hafi verið haldið námskeið um „Líkamsvitund, tjáningu og samskipti“. Námskeiðið er samstarfsverkefni ÞÞM og Blindrafélagsins og hefur Þorkell Steindal tekið þátt í framkvæmdinni f.h. félagsins. Að öðru leiti hefur ekki fallið kostnaður af námskeiðinu á félagið. Nú er sótt um styrk til Blindrafélagsins að upphæð kr. 70.000 sem nota á til að greiða rútuferð til Sandgerðis og kennslustund í hreyfingu fyrir þátttakendur í námskeiðarlok.
Styrkbeiðnin samþykkt samhljóða.
e) ÖBÍ er að mynda starfshóp til að fjalla um nýtt starfs- og endurhæfingarmat í stað núverandi örorkumats. Lagt er til að hvert og eitt aðildarfélag ÖBÍ leggi til einn fulltrúa í nefndina. Samþykkt að formaður félagsins, KHE, verði fulltrúi félagsins í nefndinni.
f) Tölvupóstur hefur borist frá norsku blindrasamtökunum þar sem óskað er eftir því að Blindrafélagið tilnefni fulltrúa í dagskrárnefnd fyrir næstu NSK ráðstefnu. Samþykkt að KHE verði fulltrúi félagsins í nefndinni.
g) Erindi hefur borist frá finnsku blindrasamstökunum vegna norrænnar þróunarráðstefnu sem haldin verður þar í landi í júní n.k. Í erindinu er upplýst um kostnað vegna þátttöku í ráðstefnunni. Samþykkt að KHE og HSG fari nánar yfir málið og kanni hvort ástæða sé fyrir Ísland að taka þátt í þessari ráðstefnu. Engin ákvörðun um þátttöku tekin.
5. Skýrslur
a) Formaður lagði fram skriflega skýrslu og fór yfir helstu atriði hennar á fundinum. Stuttar umræður talþjón. ÓÞJ ítrekar áhuga sinn á þjónustu frá RUV sem felur í sér lestur á textun sjónvarpsefnis.
Umræða um þörf á lagabreytingum á næsta aðalfundi. KHE segist ekki hafa undir höndum tillögur Bergvins Oddssonar um lagabreytingar sem lagðar voru fram á stjórnarfundum fyrir aðalfund 2009.
b) Framkvæmdastjóra – Skrifleg skýrsla var send út fyrir fundinn. Farið var yfir helstu atriði hennar. Engar samþykktir gerðar.
6. Kynning á viðskiptaáætlun Karl Eiríkssonar sem fjallar um markaðssetningu á Þríkrossinum á Ítalíu – framhald frá fyrri fundum.
Í upphafi bauð formaður félagsins þau Karl Eiríksson og Kristínu eiginkonu hans velkomin á fundinn. Þau hjón hafa hug á því að markaðssetja og selja þríkrossinn á Ítalíu og vilja flytja þangað í þeim tilgangi. Þau gerðu grein fyrir áætlunum sínum varðandi þetta. Þeirra óskir eru að kaupa vöruna beint af Blindrafélaginu á verði sem er 15% hærra en framleiðsluverð er á hverjum tíma. Varan verði staðgreidd til Blindrafélagsins. Þau munu byrja smátt í markaðssetningu á Ítalíu og vinna á svæði í nágrenni við væntanleg heimkynni sín þar. Í markaðssetningunni skal farið með nafn Blindrafélagsins og Þríkrossins í samræmi við óskir og fyrirmæli Blindrafélagsins þar um. Ennfremur skal sölusvæði og aðrir skilmálar nánar skilgreindir í samningi milli aðila. Þau Karl og Kristín áforma að leita eftir samvinnu við blindrasamtök á Ítalíu við markaðssetninguna og bjóða þeim hlutdeild af væntanlegum söluhagnaði.
Stjórnarmenn spurði þau hjón ýmissa spurninga varðandi þetta mál og að þeim loknum þakkaði formaður þeim fyrir komuna og greinargóð svör.
Þar á eftir hófust fjörugar umræður um málið þar sem nokkuð var tekist á um verkefnið og hvort það væri áhugavert fyrir félagið eða ekki.
Að lokum voru greidd atkvæði um hvort félagið ætti að til samninga við þau hjón og selja þeim Þríkrossinn til sölu- og markaðssetningar á Ítalíu á áðurnefndum forsendum.
Tillaga þar um var felld með þremur atkvæðum gegn tveimur.
7. Tillögur nefndar um fullgildingu Sáttmála SÞ um réttindi faltaðs fólks
Samþykkt var að þau KHE, ÁEG og HSG taki þátt í störfum nefndarinnar.
- Önnur mál
Engin önnur mál voru til umræðu.
Fleira var ekki gert og fundi slitið kl. 18:25
Fundargerð ritaði Ólafur Haraldsson
