Reglur er varða úthlutun leiguíbúða

I. Skilyrði fyrir umsókn

Til að umsókn um leiguíbúð hjá Blindrafélaginu teljist gild þarf umsækjandi að uppfylla eftirfarandi skilyrði:

1. Vera skuldlaus félagsmaður í Blindrafélaginu.

2. Að vera undir ákveðnum tekju- og eignamörkum.

3. Vera í húsnæðisvanda. Almennt telst sá sem er án húsnæðis, býr inni á öðrum, leigir íbúð umfram greiðslugetu eða er í óhentugu húsnæði vera í húsnæðisvanda. Eigi umsækjandi eða maki hans íbúðarhúsnæði sem er í útleigu eða í annarri notkun en til eigin búsetu þá telst hann almennt ekki vera í húsnæðisvanda, nema um sérstakar aðstæður sé að ræða.

4. Hafa ekki sögu um ofbeldisbrot, kynferðisbrot, auðgunarbrot eða fíkniefnabrot, eða eiga við virkan vímuefnavanda að stríða sem hamlar því að viðkomandi geti búið í almennu leiguhúsnæði á vegum Blindrafélagsins.

Þegar umsækjandi hefur áður verið leigjandi hjá Blindrafélaginu er horft til reynslu og greiðslusögu í því viðskiptasambandi.

II. Fylgigögn með umsókn

Til að umsókn um íbúð teljist gild þurfa eftirfarandi gögn að fylgja:

1. Umsókn um leiguíbúð í húsi Blindrafélagsins

2. Afrit af síðasta skattframtali og staðgreiðsluyfirlit fyrir yfirstandandi ár

4. Sakavottorð. Sakavottorð má ekki vera eldra en þriggja mánaða við afgreiðslu umsóknar.

Þá er óskað eftir nauðsynlegum upplýsingum um sérþarfir umsækjenda. Blindrafélagið metur við úthlutun m.a. hvort húsnæðið henti þörfum umsækjenda.

Ósk um sakavottorð er fyrst og fremst sett fram til að verja hagsmuni annarra leigjenda sem eru í leiguíbúðum í húsi Blindrafélagsins.

Blindrafélagið áskilur sér rétt til þess að leigja ekki einstaklingum sem hafa sögu um ofbeldisbrot, kynferðisbrot auðgunarbrot eða fíkniefnabrot. Það sama á við um umsækjendur sem eiga við virkan vímuefnavanda að stríða sem að mati úthlutunarnefndar Blindrafélagsins hamlar því að viðkomandi geti búið í almennu leiguhúsnæði í húsi Blindrafélagsins.

Heilsufarsupplýsingar og sakavottorð eru lögð fram á grundvelli upplýsts samþykkis umsækjanda. Farið verður með persónupplýsingar í samræmi við lög um persónuvernd og vinnslu persónuupplýsinga, þar á meðal um vinnslu, varðveislu og eyðingu upplýsinganna. Upplýsingar frá umsækjendum eru eingöngu notaðar vegna úrvinnslu umsókna og verður eytt að lokinni úthlutun.  

III. Úthlutun íbúða

Við úthlutun íbúðar þarf að liggja fyrir afrit af síðasta skattaframtali og staðgreiðsluyfirliti líðandi árs. Blindrafélagið hefur heimild um að kalla eftir nýju sakavottorði við úthlutun íbúða.

Þættir sem horft er til við úthlutun íbúða er:

• Núverandi húsnæðisúrræði

• Fjölskylduaðstæður

• Mat á því hversu hentug viðkomandi leiguíbúð Blindrafélagsins er fyrir umsækjanda

Skilyrði úthlutunar er að umsækjandi sé í skilum við Blindrafélagið. Eigi umsækjandi óuppgerðar skuldir við Blindrafélagið skulu þær gerðar upp áður en til úthlutunar kemur.

Blindrafélagið veitir ekki upplýsingar til þriðja aðila um einstakar úthlutanir. Umsækjendur sem ekki fá úthlutun fá ekki sérstakan rökstuðning fyrir þeirri ákvörðun.

Sérstök úthlutunarnefnd fer yfir umsóknir og úthlutar. Úthlutunarnefndin er skipuð tveimur fulltrúum af skrifstofu Blindrafélagsins, auk þess er félagsráðgjafi Sjónstöðvarinnar, Þjónustu og þekkingarmiðstöðvarinnar fyrir blinda, sjónskerta og fólk með samþætta sjón- og heyrnaskerðingu, nefndinni til ráðgjafar. Framkvæmdastjóri, sem að veitir umsóknum viðtökum, útbýr yfirlit yfir umsóknirnar og stillir umsóknunum upp fyrir úthlutunarnefndina til að vinna með og úthluta eftir.

IV. Leiguverð

Leiguverð íbúða er mismunandi og tekur mið af stærð.

V. Leiguverð er hóflegt en þarf að vera sjálfbært þannig að rekstur Blindrafélagsins standi undir rekstrarkostnaði og afskriftum, auk greiðslu vaxta, verðbóta og afborgana lána.

Leiguverð er uppfært mánaðarlega í takt við þróun vísitölu neysluverðs til verðtryggingar.

Leigjendur greiða auk húsaleigu, húsgjöld og gjald vegna hita og rafmagns.

VI. Leigusamningur

Við úthlutun er gerður tímabundinn leigusamningur til reynslu og er hann að lágmarki til þriggja mánaða. Ef vel gengur á reynslutíma er leigjanda boðinn ótímabundinn leigusamningur.

Upphafsdagsetning leigusamnings skal miðast við afhendingardag.

Í leigusamningi er tilgreind fjárhæð mánaðarlegrar leigu og húsgjalda. Við afhendingu íbúðar á öðrum tíma en um mánaðamót eru leiga og húsgjöld fyrsta mánaðar reiknuð hlutfallslega miðað við afhendingardag.

Leigjandi greiðir tryggingu fyrir réttum efndum á leigusamningi sem samsvarar þriggja mánaðar leigu.

Leigjandi hefur val um að greiða tryggingarféð í einu lagi við upphaf leigu eða að dreifa því á 12 mánuði, einnig tekur Blindrafélagið við bankaábyrgð fyrir tryggingarfé. Blindrafélagið varðveitir tryggingarféð og endurgreiðir leigutaka það við lok leigutíma, standi hann við réttar efndir leigusamningsins. Tryggingarféð er uppreiknað m.v. vísitölu neysluverðs til verðtryggingar. Tryggingin er fyrir réttum efndum á leigusamningnum, þ.e. fyrir leigugreiðslum og skaðabótum vegna tjóns á hinu leigða sem leigjandi ber ábyrgð á samkvæmt ákvæðum húsaleigulaga eða almennum reglum.

Leigjendur sem ekki standa skil á mánaðarlegri leigu og húsgjöldum eða brjóta húsreglur Blindrafélagsins fá ekki endurnýjun leigusamnings að reynslutíma loknum.

Leigjendur sem lenda í vanskilum og semja ekki um skuldina eða brjóta ítrekað húsreglur eiga á hættu að ótímabundnum leigusamningum sé sagt upp. Verulegar vanefndir þar sem ekki næst samkomulag um úrbætur milli leigjanda og Blindrafélagsins geta leitt til riftunar leigusamnings.

Gjalddagi mánaðarlegrar leigu og húsgjalda er fyrsti virki dagur hvers mánaðar og eindagi 14 dögum seinna. Sé ekki greitt á eindaga reiknast dráttarvextir frá gjalddaga.

Leigjendum er óheimilt að framleigja íbúðina eða hluta hennar.

VII. Afhending, trygging, breytingar og skil á húsnæði og umgengnisreglur

Við afhendingu fer fram innskoðun íbúðar þar sem viðkomandi leigjandi eða aðili á hans vegum fer yfir húsnæðið með starfsmanni Blindrafélagsins.

Ástand íbúðarinnar er skoðað nákvæmlega og það merkt inn á sérstakt úttektareyðublað. Þá er farið yfir öryggismál. 

Leigjendur hafa fjórar vikur til að gera athugasemdir við innskoðun eftir afhendingu.

Leigjendur skulu hleypa starfsmönnum Blindrafélagsins að íbúðum sínum með eðlilegum fyrirvara til að sinna viðhaldi og vegna neyðartilfella.

Allar íbúðir sem Blindrafélagið afhendir eru nýmálaðar, þrifnar og yfirfarnar af fagmönnum.

Leigjendum íbúða Blindrafélagsins er skylt að ganga vel um húsrými og lóð og fara eftir húsreglum sem gilda hverju sinni. Nánari upplýsingar um húsreglurnar eru á heimasíðu félagsins.

Við lok leigutíma eiga leigjendur að afhenda húsnæðið þrifið. Við skil íbúðar fer fram útskoðun þar sem ástand íbúðarinnar er borið saman við innskoðun. Ef í ljós koma skemmdir umfram hefðbundið slit í samræmi við leigutíma skal það metið og krafa gerð á leigjanda í samræmi við það. Ef þrifum er ábótavant er Blindrafélaginu heimilt að kaupa þrif á kostnað leigjanda. Við lok leigutíma skal skila öllum lyklum. Þegar þessi atriði liggja fyrir er gengið frá endurgreiðslu tryggingarfjár.

Reglur þessar tóku gildi þann 30. maí 2025.